NAGA CITY- Dagos-dagos pa an pagpapadara nin bunot kan LGU-San Fernando para sa mga naapektaran kan oil spill makalihis na maglubog an MT Terra Nova.
Sa entrevista kan Bombo Radyo Naga ki Mayor Fermin Mabulo kan San Fernando, CamSur, sinaysay kaini na nakaabot na soboot an 10 asin 6 Wheeler truck na saindang napakiulayan na magdara kan nasambitan ng bunot sa mga apektadong lugar siring kan Bataan, Zambales, Pampanga asin Cavite.
Sigun sa alkalde, gikan soboot an bunot sa mga darakulang koprahan o kaya man pigriribay nin bagas an mga bunot na nakukua kan mga residentes gikan sa mga baybayon tangani sana na makatipon asin maipadara sa mga nangangaipuhan orog ta dae pa tapos an problema sa oil spill.
Katakod kaini, piggigiling soboot an mga bunot asin ginigibong siring kan hotdog pillow asin piglatag sa mga apektadong kadagatan tanganing mag-absorb an langis na nagtagas.
Sa ngunyan, dagos an pag-enkaminar kan opisyal sa gabos na makipagtabangan sa sainda tanganing makapagpadara man nin asistensiya sa mga provincial government na apektado kan oil spill.
