NagpakoL na sa nasa poco mas o menos P1-M an danyos na winalat kan panlalamasa ni Bagyong Kristine sa siyudad nin Naga.
Sa entrevista kan Bombo Radyo Naga ki Marilee Lingua, pamayo kan City Veterinary Office, sinaysay kaini na nagpakol na sa minimum cost na poco mas o menos P1-M na danyos sa nasambitan ng sektor huli sa nairehistrong pagkagadan kan mga orig, baka, kambing pato, pabo, manok asin iba pa.
Katakod kaini, sigun ki Lingua, mahalat pa an saindang opisina sa itataong asistansiya gikan sa magkakanigong ahensiya.
Sa ibong na lado, bastante pa man an suplay kan karneng orig sa siyudad nin Naga huli ta kadaklan sa nagpapabuno an gikan sa luwas kan Naga City.
Apwera digde, naglinig naman sa kanya-kanya nindang pwesto ang mga paratinda kan karneng orig. Mientrastanto, pigsaysay pa kan opisyal na sa huring pag-ikot kan saindang mga personahe nakumpiskar an red light na piggamit tanganing magmukha na fresh an karneng orig.
Sa ngunyan, padagos an pakikipag-koordinar kan City Veterinary Office sa mga naapektaran na livestock owner tanganing matawan an mga ini nin magkakanigong tabang.
