NAGA CITY- Gadan an sarong lolo makalihis na pagtatagaon kan saiyang kainuman sa barangay Umiray Gen. Nakar, Quezon.
Binisto an biktima na si Desiderio Lendio, 63 anyos.
Sa nakuang impormasyon kan Bombo Radyo Naga, napag-araman na nag-iinuman sana sa nasambitang lugar an biktima, mga amigo kaini asin an suspek na si Edgar Dela Cruz, 33 anyos kan magkaigwa nin dae pagkakasinabutan sa pag-ultanan ninda Lendio asin kan suspek.
Tulos na nagkua nin sundang an mga ini kun saen pinagtataga ni Dela Cruz si Lendio kun saen nagsapo an nasambitang biktima nin labing lugad sa saiyang payo na nagresulta sa tulos na kagadanan kaini.
Mientrastanto, nagsapo man nin lugad sa saiyang lawas an suspek.
Makalihis an insidente tulos man na nagdulag an suspek pasiring sa dae pa maaraman na direksyon dara an sundang na ginamit kaini sa nasambitang krimen alagad tulos man ining nagsuko sa mga otoridad.
Sa ngonyan, nasa kustudiya na kan mga otoridad an suspek mantang inaandam na man an kasong Homicide na isasangat laban digdi.
