Pinapaapod kan Land Transportation Franchising and Regulatory Board (LTFRB) an 19 Transport Network Companies (TNCs) makalihis makaresibe nin mga reklamo hale sa nagkapirang rider manungod sa dai pag-implementar kan aprubadong fare increase para sa Transport Network Vehicle Services (TNVS).
Magigirumdoman na ipinaotob kan LTFRB kan Lunes an bagong pasahe para sa mga public utility vehicle (PUV), kaiba an mga TNVS.
Sa irarom kan bagong fare matrix, naglangkaw hale sa ₱45 pasiring ₱65 an base fare para sa TNVS sedan. Para man sa Asian Utility Vehicle (AUV), ₱55 na an base fare hale sa dating ₱35, mantang ₱65 na man an base fare para sa hatchback. Mientrastanto, ₱165 man an bagong base fare para sa premium TNVS.
Huli kaini, pinagsuratan kan LTFRB an 19 TNCs tanganing ipaliwanag kun tano dai sinda dapat patawan nin suspensiyon o kanselasyon kan saindang accreditation huli sa daing pagsunod sa ipinagboboot na fare hike.
Gigibuhon an hearing sa Oktubre 7, kun sain tatawan nin oportunidad an mga kinauukulan na TNC na magpaliwanag manungod sa mga reklamo.
