Pigsugo kan Land Transportation Franchising and Regulatory Board (LTFRB) an mga regional office kaini na tabangan an mga operator asin driver kan public utility vehicles (PUVs) sa pagkuha nin fare guides para sa pagpapatupad kan bagong pamasahe.
Ini an nangyari matapos ireport na igwa nin nagkapirang driver na nag-aatubili na maningil nin dagdag-pasahe huli mayo pa sindang kapot na fare matrix.
Segun ki LTFRB Acting Chairman Greg Pua Jr., dai na kaipuhan na halaton an opisyal na fare matrix para maipatupad an aprubadong dagdag-pasahe.
Imbes, pwedeng gamiton muna kan mga PUV operator asin driver an temporary fare guide na pwedeng i-download sa website kan LTFRB.
Magdadanay na valid an temporary fare guide sagkod Disyembre 31, 2026.
Poon Enero 1, 2027, kaipuhan nang magkaigwa asin magkaag sa saindang mga sasakyan nin official fare guide o fare matrix na iluluwas kan LTFRB.
