Nakatalaang iimbestigaran ngunyan kan Bureau of Customs (BOC) an mga luxury cars na pag-sasadiri kan pamilya kan dating Pasig mayoral candidate na si Sarah Discaya.
Ini man an tangani aramon kun igwa nin nagin pagbalgar sa pag-i-import kan nasa 40 na mamahaling lunadan na ibinida ni Discaya sa nagkapirang interview antes man an 2025 midterm elections.
Sa sarong estrevista, sinaysay ni Customs Commissioner Ariel Nepomuceno na sisiyasaton kan ahensiya an mga consignee sa pag-i-import kaini.
Saro si Discaya sa mainit na pinag-uulayan sa tahaw kan isyu kan palpak o ‘ghost’ flood control projects.
Ini man an may sadiri kan nagkapirang kumpanyang pinangaranan ni Presidente Ferdinand R. Marcos Jr. na nakakua nin kadakol na kontrata sa flood control projects.
Marurumdumang kansuarin sana, kan magbisita sa Calumpit, Bulacan si Presidente Marcos Jr. kun saen dismayado ini kan personal na mahiling an palpak na flood control project asin pigsugo an nagin contractor kaini na St. Timothy Construction Corporation na magpaliwanag.
Sa presente, mayo pang pahayag si Discaya asin pighahalat pa an kasimbagan kan lado kaini katakod sa isyu.
