NAGA CITY- Pighahandalan ngonyan na maiinaan an mga pilgrims na masakat sa Mt. Banahaw sa probinsya nin Quezon kasabay kan Semana Santa makalihis na maglakop an salang impormasyon sa paagi nin sarong Facebook post.
Sa entrevista kan Bombo Radyo Naga ki Magtanggol Barrion, park maintenance foreman kan Provincial Environment and Natural Resources (PENRO) Quezon, sinaysay kaini na nilalaoman nindang mabulos an maabot sa 15,000 na pilgrims sa Mt. Banahaw.
Alagad, pigtuga kaini na posibleng makaapektar sa numero kan nasambitang mga bibisita sa pilgrimage site an sarong Facebook post na suboot nagsasabing P250 an entrance fee asin P2,500 man an pighahagad sa mga magamit nin tents.
Tinawan doon ni Barrion na dae totoo an nasambitang impormasyon huli ta sa inaprubaran na resolusyon kan DENR asin Protected Area Management Board (PAMBI) na solamenteng P20 sana an singil na entrance fee tuyong Semana Santa mantang P100 man para sa tents.
Dugang pa kan opisyal, igwa nin mga nag-react sa nasambitang Facebook post asin inapod an atensyon kan lokal na gobyerno kan banwaan nin Dolores.
Napag-araman na kan nakaaging Viernes Dolores pa sana, nag-abot na sa 7,000 pilgrims an nagbisita sa inaapod na ‘holy mountain.’
