NAGA CITY– Gadan an sarong drug personality mantang arestado an apat na iba pa sa magkasuhay na anti-illegal drug operations kan mga otoridad sa Lucena City sa probinsiya kan Quezon.
Sa nakuang impormasyon kan Bombo Radyo Naga, napag-araman na enot na sinagibo an sarong buy bust operation sa Barangay Ibabang Iyam asin target kaini an suspek na si Rhenyear Magadia, 35-anyos.
Bigla na sana nagbunot asin nagpaputok nin badil an suspek kan aarestuhon na ini kan mga operatiba kaya napiritan na magbalos nin putok an mga pulis na nagresulta sa pagkagadan ni Magadia.
Narekober sa pinangyarihan kan insidente an sarong cal. 38 revolver na may tolong bala, 10 sachet nin pigtutubodang shabu asin mga basyo kan bala.
Mientrastanto arestado an suspek na si Nelson Aguirre, 58-anyos sa sarong search warrant sa Barangay Ibabang Dupay.
Sa katahawan kan operasyon, papaputokan pa kudta na kan suspek an mga pulis gamit an saiyang cal. 38 na revolver alagad naenotan siya kan mga ini kun saen tinamaan sa tabay si Aguirre.
Naaktuhan sa laog kan harong ni Aguirre an tolong suspek na sinda Rizalina Tolentino, 50-anyos, Lem Garcia, 50-anyos, asin si Aldrin Aparte, 49-anyos mantang nagpa-pot session.
Narekober kan mga otoridad sa apat na mga suspek an walong sachet nin pigtutubodang shabu, mga drug paraphernalia, sarong cal. 38 revolver na may duwang bala asin sarong granada.
Sa ngunyan nasa kostudiya na kan mga otoridad an nasambitan ng mga suspek mantang pigpepreparar na an kasong pagbalgar sa RA 9165 o an Comprehensive Dangerous Drugs Act of 2002 na isasangat laban sa mga ini.
