Aminado an Department of Energy (DOE) na an mahewasang pagbaha dara kan mga nakalihis na bagyo asin habagat an nagin primerong hadlang para sa marekas na pagbebweltada kan kuryente sa mga komunidad sa nasyon na sinalanta kan matinding pag-uran.
Kun saen napauktaba soboot kan baha an mga linement asin power utilities sa pag-access sa mga raot na linya asin madalas na naghahaloy pa nin pirang aldaw o semana antes maibweltada an serbisyo.
Basado sa datos kan ahensiya nag-abot sa 506 na kaharongan sa Bulacan an nagtitinir na mayong kuryente hasta kan nakalihis na Hulyo 31, limang aldaw makalihis na magluwas sa nasyon an mga nakalihid na bagyo.
Mantang sa Pangasinan man, nag-abot man sa limang aldaw an pagkawara kan kuryente sa nagkapirang binahang lugar.
Paliwanag ni DOE Undersecretary Felix William Fuentebella na an pagbebweltada kan kuryente an bako sanang pagpapakarhay kan mga raot na linya, kundi pagsierto sa kasalbaduhan kan mga obrero asin mamamayan.
Kaipuhan soboot halaton munang magbaba an tubig tanganing malikayan an peligro kan electrocution asin pagkaraot kan kagamitan.
Apwera sa kuryente, naapektaran man kan baha an operasyon kan mga gasolinahan asin iba pang serbisyo, na pwedeng makaapektar sa transportasyon, kabuhayan, asin supply chain.
Pig-enkaminar man kan DOE an publiko na makisumaro sa pagmamantinir kan kasalbaduhan, likayan na ranihan an mga binahang electrical facilities, asin i-report an mga naputol na linya.
