Padagos an pagsigbo kan gobyerno kan Indonesia sa mahiwas na wildfires sa Kalimantan asin Sumatra na nagpoon kan Enero.
Sa intrevista kan Bombo Radyo Naga ki Lyn Dolor – Bombo International News Correspondent in Indonesia, sinaysay kaini na maabot na sa 286,000 ektarya an apektado kan mga kasulo.
Pig-esplikar man kaini na an mahibog na aso nagkaigwa nin dakulang epekto sa salud, na may 165,000 na kaso nin acute respiratory infection. An Air Quality Index uminabot na sa 600 sa nagkapirang lugar, na nagtulod sa gobyerno na magdagdag nin mga poste medikal asin mga pasilidad sa malinig na aire.
Apektado man an mga eskwelahan, negosyo, transportasyon asin nagkapirang agrikultural na plantasyon. Padagos an mga pagputok nin kasulo sa daga, pambobomba sa tubig, mga patrolya sa eroplano asin mga operasyon sa pagtanom nin panganuron, mantang mga 7,000 na mga hotspot an nairehistro.
Mientrastanto, anom na kumpanya an naireport na na-sanction katakod kan mga wildfires. Sinabi man kan Embahada kan Pilipinas na mayo pang direktang naapektaran na mga Pilipino maski may mga parte sa Pilipinas na nakaeksperyensya nin haze.
Dugang pa ni Dolor na inaabisuhan an publiko, orog na an mga kaakian, mga gurang asin mga may problema sa paghangos na magsulot nin face mask asin likayan an maating duros mantang nagpapadagos an wildfire.
