NAGA CITY- Mas nadugangan pa ngunian an numero kan mga banwaaan sa probinsya nin Camarines Sur na nairehistro an mahiwasang pagbaha dara kan haros dagos- dagos na pag-uuran.
Sa nagunong impormasyon kan Bombo Radyo Naga, napag araman na gikan sa dating 10 mga lugar, nag-abot na ngunian sa 14 mga banwaan an naglangkaw na an lebel kan tubig.
Meintrastanto, nagkakapirang mga evacuees na man an nagtitinir ngunian sa mga evacuations centers makalihis tulos na ipaotob ni Camarines Sur Governor Migz Villafuerte an mandatory evacuation sa mga low-lying asin landslide prone areas sa probinsya.
Sa banwaan kan Lagonoy, maabot man sa 400 pamilya an apektado kan pagbaha na haros lampas tao na an langkaw.
Sa banwaan man kan Lupi, pig-ibakwar na man an maabot sa walong pamilya huli sa posibilidad na liwat na pagtupas nin bukid na harani sa mga kaharungan.
Sa ngunian, nagpapadagos pa man an monitoring kan Provincial Disaster Risk Reduction and Management Office (PDRRMO)- Cam Sur sa manlaenlaeng lugar sa probinsya tanganing masiyerto na yaon sa marhay na kamugtakan an mga residente mantang padagos na namamatean an raot nin panahon.
