Pigsierto kan Malacañang na mahigot na babantayan kan gobyerno nasyonal an paggastos asin paggamit kan Local Government Support Fund (LGSF) ngani na maibitaran an anuman na porma nin pag-abuso sa pondo kan publiko.
Segun ki Palace Press Officer Undersecretary Claire Castro, an responsibilidad kan gobyerno nasyonal sa mga lokal na gobyerno (LGUs) dai natatapos sa pagdistribwir kan pondo.
An pondo na ini nakatagama para sa manlaen-laen na pampublikong proyekto arog kan imprastraktura, farm-to-market roads, sistema nin tubig, pasilidad sa salud, disaster resiliency, asin pagtabang sa mga vulnerable sectors.
An budget kan LGSF ngonian na taon pinalangkaw sa P57.8 bilyones, mantang pigrerekomendar na dagdagan ini sa P58.53 bilyones pag-abot kan 2027.
Kabali man sa mga benepisyaryo iyo an Bagong Pilipinas Rice Program, na obhetong matawan nin 10 kilong libreng bagas kada duwang bulan an haros walong milyon na pamilyang Pilipino.
Kasabay kaini, pig-anunsyo man ni Executive Secretary Ralph Recto na piglalaoman na malangkaw sa P1.4 trillion an National Tax Allotment sa 2027 kun saen P676.9 bilyon an nakatalaan para sa mga LGUs sa Luzon.
Sinabi ni Castro na an pagdagdag sa LGSF sarong tultol na kasimbagan sa mga pangangaipo asin kahagadan na ipinaabot kan mga lokal na lideres ki Presidente Ferdinand Marcos Jr.
