Malinaw na sinabi kan Palasyo na bakong epektibong paagi an pag-ipon nin inumon na tubig o bottled water bilang pagpreparar sa nagdadangadang na pagtama kan ‘Super El Niño.’
Sa sarong pahayag, pinagiromdom ni Presidential Communications Office (PCO) Undersecretary asin Palace Press Officer Claire Castro an publiko na magpreparar manungod digdi, alagad hinimok man sinda na likayan an pagpa-panic huli ginagarantiya kan Palasyo na mayo man daa nin report na magkakaigwa nin kakulangan sa suplay nin inumon na tubig.
Lininaw man ni Castro na bakong marhay an panic buying asin an labi-labing pag-ipon nin tubig sa suplay sa merkado huli ta ini pwedeng magkawsa nin paglangkaw kan presyo kan nasabing produkto.
Mantang, konektado digdi, nag-anunsyo an National Water Resources Board (NWRB) na ibaba ninda an water allocation para sa Metro Manila hale sa 52-53 cubic meters per second pasiring sa 44 cubic meters per second poon sa bulan nin Oktubre bilang pagpreparar sa Super El Niño.
