Dae na mapugulan ni eight-division world champion Manny Pacquiao na puspusan na an pag preparar para sa saiyang comeback fight sa Hulyo 19 kontra ki reigning World Boxing Council champion Mario Barrios sa Las Vegas, Nevada.
Dagus-dagus an training camp ni Pacquiao sa Wild Card Gym kaiba sinda trainer Buboy Fernandez asin American coach Freddie Roach tangani siertuhon na nasa magayon na kundisyon ini.
Nagpapartisipar si Pacquiao sa pirang magigian na workout mantang may running session man ini pagkaaga kaiba an saiyang bilog na team. Piglalaoman na mas matindi pa an training ni Pacquiao sa mga masunod na semana tanganing maibalik an bagsik kan saiyang kamao. Pirang taon man napundo si Pacquiao sa professional boxing kun kaya desidido ining liwat makua an 100 porsiyentong bangis sa ibabaw kan ring.
Marurumduman kan nakalihis na taong 2021 pa an huring professional fight kaini kun saen nadaog ini ki Cuban Yordenjs Ugas via unanimous decision rason tanganing butasan an WBA belt kaini. Nag salang man sa pirang exhibition match si Pacquiao alagad iba an exhibition kumparar sa totoong boxing fight.
Bakong suba an lalaugon na laban ni Pacquiao nin huli sa pirang taon ining nagpahingalo asin mas mas huben an makakalaban kaini sa ngaran kan 30-anyos na si Barrios. Alagad mayong nahihiling na problema si Pacquiao nin huli ta gigil na gigil ini na magbweltada sa ring asin aminadong namiss kaini an siring kaining klase kan laban.
