Padagos na binabantayan an bagyong Crising na naghihiro sa laog kan Philippine Area of Responsibility.
Mantang ini an nasa katubigan kan nasyon, laoman na orog pa kaining pakukusugon an nag iiral na southwest monsoon o habagat na madara nin mga pag-uran sa dakulang parte kan Luzon asin Visayas magin sa pirang parte kan Mindanao.
Basado sa presenteng track o hiro kan bagyo, nilalaoman na maagi ini o ma-landfall sa parte kan mainland Cagayan saagang banggi o Sabado nin pagkaaga. Posible man ining nagkusog pa hasta sa Severe Tropical Storm ngunyan na pagkabanggi.
Sa Dominggo man, lalaoman na makakaluwas na ini nin nasyon pag abot nin alas 2 nin mag oomagahon. Huring namataan an sentro kan bagyong Crising sa rayong 470 km East Northeast kan Virac, Catanduanes.
Dara kaini an kusog kan duros na nag aabot sa 55 kph harani sa tahaw asin man pagbugso na nag aabot sa 70 kph. Naghihiro an nasambitan ng raot kan panahon pa North Northwestward sa rikas na 25 kph.
Sa ngunyan, nakataas pa man an Tropical Cyclone Wind Signal Number 1 sa Southern portion kan Batanes, Cagayan kabali an Babuyan Islands, Isabela, Quirino, northeastern portion kan Nueva Vizcaya, northern portion kan Aurora, Apayao, Abra, Kalinga, Mountain Province, Ifugao, Ilocos Norte, northern portion kan Ilocos Sur asin northern and eastern portions kan Catanduanes.
Huli sa mahewas na kaulapang dara kan bagyong Crising, lalaoman na man an mga serye nin pag-uran sa dakulang parte kan nasyon. Pinapalikay man an gabos sa posibleng pagbaha asin pagrasay nin daga sa mga bulnerableng lugar.
