Iprinisentar kan House Prosecution Panel sa pandangog nin misuse of confidential funds ni Vice President Sara Duterte an sarong acknowledgment receipt hale sa Office of the Vice President (OVP) na isinumiter sa Commission on Audit (COA).
Nasambit igdi an kontrobersiyal na pangaran “Mary Grace Piatos” ay nagtanggap nin ₱70,000 bilang “payment of reward (medicines)”.
Segun sa testigo kan prosekusyon na si Roderick Wamil, dating state auditor kan COA Intelligence and Confidential Funds Audit Office o ICFAO, an acknowledgment receipt na ini ay dae sapat asin kulang sa mga supporting documents.
Tinawan-duon niya na an resibong ini ay may posibleng paglabag sa Joint Circular 2015-01 huli ta mayung kalakip na dokumentong nagpapatunay nin tagumpay o documents evidencing success nin operasyon o transaksyon na siyang mahigpit na rekisito kun nagluluwas nin “payment of rewards” gamit an confidential funds.
Hinapot din ni House prosecution counsel Atty. Lorna Kapunan an testigo kun an ibinayad ba na reward ay gamot?
Segun sa testigo, dae ini masasabi sa paagi lamang nin kapot na resibo kaya naman naghagad an COA nin dagdag na paliwanag asin dokumento.
Manonotaran na haloy ng kinukwestyon kan mga mambabatas sa mga isinagibong pandangog sa House of Representatives kaito an pangalang Mary Grace Piatos huli kahawig ini kan pinagsarong pangaran na sikat na chichiria at restuarant.
Kinumpirma din kaito an Philippine Statistics Authority (PSA) na mayung opisyal na rekord (birth, marriage, o death certificate) an pangarang “Mary Grace Piattos” sa bilog na bansa, kaya nagtutubod an prosekusyon na ini ay sarong pekeng pagkakabisto nganing itago an paggasta sa confidential funds.
