NAGA CITY- Mas halangkaw na basura an nakolektar sa pigkundusir na Bicol region-wide cleanup katakod sa selebrasyon kan International Coastal Cleanup Day, sigun sa Department of Environment and Natural Resources Bicol.
Sigun ki DENR Bicol Regional Executive Director Francisco Milla Jr. an basura na nakolektar ngunyan na taon an nagpakol sa 9,027 kilograms kumparar sa 8,180 kgs kan 2024.
Dugang pa kan opisyal, an laban kontra sa marine pollution an sarong year-round effort asin kaipuhan na tawan nin suporta an inisyatiba na masuporta sa mga kadagatan siring kan paglilinig sa kapalibutan.
An mga basura na nakolektar an siring kan grocery bags, bote, mga lata, takop, upos kan sigarilyo, plastic straws, cups asin utensils, mga patos kan pagkakan asin kendi, styrofoam, lids, fishing lines and nets, rope, diapers, slippers, tires, clothing, e-cigarettes, toy plushies, asin parte kan appliances.
Sa Camarines Norte, an mga volunteers nakakolektar nin poco mas o menos 2,206 kg kan solid waste gikan sa tolong cleanup sites: San Jose sa Talisay, Bagasbas sa Daet, asin San Roque sa Mercedes.
Sa Legazpi City, nagpakol sa 1,644.48 kg kan basura an nakolektar gikan sa baybayon kan Barangays Lamba, Puro, asin Macabalo River sa Dapdap, asin 147 na sako sa probinsiya kan Masbate.
Mantang sa baybayon man kan Virac asin Bato sa Catanduanes, nagpakol man sa 345 na sako na nagkakantedad nin 1,158 kg an nakolektar asin 216 na sako na nagpapakol man sa 1,610.71 kg sa Sorsogon.
Mientrastanto, nag-abot man sa kabilugang 10 sako kam basura an nakolektar na igwang gabat na nag-aabot sa 63 kg sa pigkundusir na cleanup drive sa Barangay Coguit, Balatan, Camarines Sur, asin 624 kg sa Barangay Sta. Maria, Presentacion, Camarines Sur.
Siringman 60 kg kan basura an nakolektar sa suhay na cleanup drive sa Barangay Anib, Sipocot, Camarines Sur.
