Nagpatanid an mga eksperto na an mga glacier sa rehiyon nin Himalaya, na nagseserbing importanteng marhay na gikanan nin tubig para sa mga duwang bilyon katawo, natunaw ngonyan sa dobleng rikas kan dati kaidtong 2000.
Susog sa sarong report kan International Center for Integrated Mountain Development (ICIMOD), an kabukidan nin Hindu Kush-Himalaya na minaabot poon Afghanistan sagkod Myanmar igwa nin saro sa pinakadakulang mga estante nin yelo sa kinaban sa luwas kan Arctic asin Antarctica.
Ini nagsusuply nin dai mababa sa 10 mayor na salog sa Asya na mahalagang marhay sa suplay nin tubig, kakanon, asin enerhiya. Susog sa pag-aadal, an rate kan pagkawara kan yelo haros nagdoble poon 34 sentimetro kada taon bago an 2000, pasiring sa 73 sentimetro ngunyan.
Sa kabilogan, an yelo nag-bawas nin sagkod sa 27 metros poon kan 1975, mantang 12 porsyento kan lugar kan glacier an nawara sa pag-ultan kan 1990 asin 2020.
Ipinaliliwanag kan mga sientista na ini huli sa padagos na paglangkaw kan temperatura sa bilog na kinaban, na nag-oolang sa mga glacier na mamantinir an saindang kapal nin yelo.
Dugang pa, an polusyon arog kan itom na karbon hale sa pagsulo nin fossil fuel asin basura orog pang nagpaparikas sa pagtunaw kan mga glacier na ini.
Segun sa mga eksperto, bako na ining problema sa maabot na panahon kundi krisis na nangyayari na sa presente, kaya kaipohan an tulos na aksyon tanganing maluway an epekto kaini asin maprotehiran an supply nin tubig sa rehiyon.
