Aram baya nindo mga ka-bombo, an mga personahe kan Michigan State Police an pigpurbaran na ibalik an napurot na $5,000 sa may-sadiri kaini alagad kan apudan pighuna soboot na mga scammers an mga pulis.
Susog sa report, pig-post sa social media kan nasambitan ng hepatura na sinda an nakapurot nin kwarta sa may parte kan Monroe’s Huber Road.
Tolos man na pig-apudan kan Michigan State Police an haraning bangko na kun saen pigkumpirmar man na igwang sarong customer an nag-withdraw kan eksaktong kantedad kan kwarta na nakua kan saindang mga tropa.
Katakod digde, pigpurbaran man na apudan kan mga pulis an may-sadiri kan kwarta alagad digde na nagkaproblema.
Pighuna soboot kan may-sadiri kan kwarta na scammer an nag-aapod sa saiya orog na ta padagos ining nakakabareta kan mga indibidwal na nabibiktima nin fraud.
Digde na pigkumbinsi kan mga kapulisan an nasambitan ng indibidwal na bako sindang mga scammer asin an saindang katuyuhan sana an maibwelta an kwarta.
Makalihis man an pag-uulay, digde na nakumbinsi an dae na pinangaranan na may-sadiri kan kwarta na totoo an apod.
Paliwanag kan nasambitan ng indibidwal na dae kaini napansin na nahulog palan an saiyang pig-withdraw na kwarta na saiyang piglaag sa bulsa.
