NAGA CITY- Pigdeklarar an Mayo 16 komo Education Support Personnel Day para sa mga non-teaching personnel kan Department of Education.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd-CamSur, sinaysay kaini na an nasambitan ng aldaw an panahon tanganing tawan nin rekognasyon an mga non-teaching personnel sa saindang dakulang kontribusyon sa pagtatao nin serbisyo sa mga classroom.
Sigun ki Pelingon, dakula an katabangan kan mga nasambitan ng indibidwal nin huli ta sa presente basado sa kasuguan kan DepEd pighahali na an mga non-teaching load kan mga paratukdo tanganing maka-pokus sa saindang mga trabaho.
An saindang mga gibuhon an yaon na sa mga non-teaching personnel na nagigin dugang sa saindang trabaho.
Huli kaini, deserve kan mga non-teaching personnel na tawan man sinda nin aldaw tanganing ma-apresyar an saindang mga valuable contribution sa paagi kan pagtatao nin rekognasyon asin pagpapasalamat sa sainda.
Importante na namamatean kan mga non-teaching personnel pag-apresyar kan DepEd tanganing orog pang ma-enkaminar an iba na maglaog sa nasambitan ng ahensiya.
Sa ngunyan, nagpa-abot na sana nin pasasalamat si Pelingon huli ta natintaan na an ley na magtataong onra o pagbisto sa lado kan mga teaching personnel sa Kagawaran ng Edukasyon.
