Mahampang sa impeachment court si Davao City Mayor Sebastian “Baste” Duterte tanganing simbagan an mga hapot manungod sa mga transaksiyon kan gobyerno kan Davao City sa sarong kumpanya na igwang idineklarang pinansyal na interes an saiyang tugang na si Vice President Sara Duterte.
Inatasan kan Senate Impeachment Court si Baste na maghampang nin mga rekord kan transaksiyon kan gobyerno kan Davao City asin kan Gencorp Industries Inc. poon 2020 sagkod sa presente.
Segun sa House prosecutors, kaiba an Gencorp sa mga kumpanya na idineklara ni Sara Duterte na igwa siya nin pinansyal na interes sa saiyang Statements of Assets, Liabilities and Net Worth o SALN.
Sinabi kan mga prosecutor na gusto ninda maaraman kun nagkaigwa nin transaksiyon an Gencorp asin an gobyerno kan Davao City mantang alkalde si Baste asin kun paano ini isinagibo.
Plano man kan prosekusyon na hagadon sa Impeachment Court na ideklarang hostile witness si Baste. Kun pagtatawan, posible sindang maggamit nin mas direktang mga hapot sa pagkua kan saiyang testimonya. An desisyon yaon sa Impeachment Court.
Parte ini kan Article II kan impeachment case, na nag-aakusa ki Sara Duterte na dai niya isinuko an saiyang mga interes sa negosyo asin padagos siyang nakilahok sa mga negosyo mantang bise presidente.
