NAGA CITY- Nahahampang ngonyan sa kasong administratibo an alkalde sa banwaan nin Pili, Camarines Sur asin sarong barangay kagawad katakod kan dae suboot pagtatao nin relief goods sa sarong barangay kapitan.
Sa nagunong impormasyon kan Bombo Radyo Naga, napag-araman na nagsunad nin kasong administratibo si kapitan Yolanda Beriña, kan barangay New San Roque sa nasambitang lugar laban kina Mayor Tomas Bonggalonta asin barangay kagawad David Olaguera.
Ini huli suboot sa pagbalgar kan duwang opisyal sa nagkapirang mga polisiya kan Civil Service Commission (CSC).
Nagpoon an nasambitang kaso makalihis na dae itao kan alkalde an relief goods ki kapitan Beriña huli sa suboot pagdoktor kaini sa damage report na isinumiter sa Municipal Social Welfare and Development Office (MSWD).
Sinunadan man nin kaso si Olaguera huli sa piggibong pag-by-pass suboot kaini sa barangay makalihis na ilaog sa saiyang harong an mga relief goods hale sa Office of the Vice President (OVP)
Mientrastanto, pigpapaapod man kan sangguniang panglalawigan kan Camarines Sur sinda Mayor Bonggalonta asin kagawad Olaguera tanganing itao an saindang lado sa nasambitang kaso.
