Pigtutulod ni Naga City Mayor Leni Robredo an mas praktikal asin ekonomikong paagi sa paghatod kan saiyang taonan na State of the City Message (SOCM) imbes na magsagibo nin engrandeng seremonya.
Sa paghampang sa mga kagaad kan Media sinabi ni Naga City Mayor Leni Robredo na an sarong komprehensibong report nin datos pwedeng isumiter sa Konseho kan ciudad o an sarong video presentation pwedeng gamiton tanganing ipaaram sa publiko an manungod sa importanteng impormasyon kan ciudad.
Sa ngonian pig-aandam an report asin target na iluwas sa semana kan Agosto 18. Dugang pa ni Robredo, saro sa mga staff kan opisina kaini an nangengenot sa paggibo nin mga draft sa Ingles asin Tagalog tanganing maseguro an malinaw na presentasyon kan report.
Mientrastanto, pinag-olayan man ni Mayor Robredo an proponidong pagtogdok nin semiconductor facility sa Pilipinas sa lindong kan sarong consortium sa pamamayo kan Estados Unidos. An proyekto nagtutumong na mabawasan an pagsarig kan industriya sa Tsina, alagad pigduon kan alkalde na an mga proponente dapat na bukas asin transparent manungod sa epekto kaini sa kapalibutan asin sa nasyonal na suplay kan mga esensyal na serbisyo.
Tinawan-duon ni Robredo an importansya kan lubos na pag-analisar kan konsumo nin kuryente asin tubig kan pasilidad tanganing maseguro na dai ini makakaapektar sa pangangaipo kan mga komunidad. Susog pa ki Robredo na an pangangaipo na protehiran an kapalibutan asin tawan nin tamang proteksyon an mga Katutubo asin iba pang mga residente na pwedeng maapektaran o mawaraan nin harong huli kan proyekto.
Pigsuhestiyon man kan alkalde an pagkondusir nin pag-aadal sa eksperyensya kan Clark Development Zone ngani na maaraman kun tunay na nagrahay an kabuhayan kan mga komunidad na apektado kan mga nakaaging proyekto pang-industriya. Importante suboot na maseguro na an siring na mga pamumuhunan magdadara nin halawig na benepisyo sa mga Pilipino.
Komo halimbawa kan matrayumpong estratehiya sa ekonomiya, pigsambit ni Robredo an lakdang kan Indonesia na magbalyo hale sa pagluwas nin baratong Raw Materials na pasiring sa paggibo nin mga tapos nang produkto. Segun saiya, an lokal na manufacturing nagtatao nin mas halangkaw na halaga asin ingreso, kun kaya an mga Pilipino dapat an mayor na benepisyaryo kan mga bagong industriya sa nasyon.
Pigduon man kan alkalde an importansya kan pagtao nin malinaw asin toltol na impormasyon sa publiko. Dapat suboot na maghingowa an gobyerno asin mga proponents na maipaliwanag nin tama an katuyuhan asin epekto kan mga darakulang proyekto tangani na maibitaran an paglakop kan salang impormasyon asin espekulasyon sa social media.
Tinawan duon ni Robredo na an marhay na pamamahala nakabase sa madunong na paggamit kan pondo, transparency, pagprotehir sa kapalibutan, asin pagsierto na an pag-uswag na dara kan mga mayor na pamumuhunan na makikinabang an lambang mga Pilipino.
