NAGA CITY – Nagkaigwa nin deployment an MDRRMO Lupi huli sa na-eksperyensiyahan na vehicular accident.
Sa entrevista kan Bombo Radyo Naga ki Garry Cruz, MDRRMO Head Lup, sinaysay kaini na puon kan saindang Sumvac operation asin lakbay alalay , nagkaigwa soboot sinda nin meeting kan nakalihis na Abril 14 kaibahan an manlaen-laen na ahensiya siring kan BFP, PNP siring man an manlaen-laen na department heads para sa deployment kan mga clusters.
Dugang pa kaini na sa saindang lugar, gabos na along the highway barangays an nagkaigwa sinda nin deployment orog na ngunyan na kadakol an numero kan mga behikulo partikularmente ngunyan na Huwebes Santo.
Sigun pa ki Cruz na kada boundary igwa sinda nin motorist assistance, barangay assistance asin municipal center assistance man na piglatag.
Mientrastanto, nakapagrehistro nin vehicular accident sa may parte kan Sipocot kun saen harani man sa saindang banwaan, kaya tulos man na nagresponde an saindang personahes sa lugar kan insidente, ini man an pinagka-imbweltuhan kan sarong motorista na basado sa imbestigasyon igwa soboot ido kaya na out balance ini asin nagkaigwa nin minor injuries.
Pigtawan-duon pa kan opisyal na sa ngunyan magayon an saindang traffic management sa tabang man kan PNP.
Sa ngunyan, nakadeploy na man soboot an mga barangay asin sainda na man pigtawan nin authority asin responsibility huli man ta dakulang banwaan an Lupi na pigbibilog kan 38 barangay, siring man nagpaluwas man soboot sinda nin memorandum nin red alert status puon kan nakalihis na Abril 13 hasta sa maabot na Abril 20 na an gabos na barangay an imbwelto sa saindang sumvac operations.
