NAGA CITY- Padagos an pagmonitor kan MDRRMO Sagñay sa mga barangay na pigbabaha orog na an igwa nin mga spillway.
Sa entrevista kan Bombo Radyo Naga ki Noli Pielago, Operation Officer kan MDRRMO Sagñay, sinaysay kaini na sa presente nairehistro an pag-apaw kan tubig sa spillway na sakop kan Barangay Tinorongan asin Aniog alagad nagtitinir na passable man an lugar mantang igwa soboot saro pang barangay na dae na passable para sa anuman na klase kan behikulo.
Sigun pa sa opisyal, mayo man soboot nairehistrong mga na-stranded na motorista siringman mayong naikurit na pagrasay kan daga.
Apwera digde, yaon man an pagmonitor kan MDRRMO Sagñay sa kamugtakan kan saindang mga parasisira orog na ta padagos an pagbulos kan makusog na pag-uuran sa saindang banwaan asin sa dakulang parte kan Bicol Region.
Pigsierto man ni Pielago na 24 oras na nakamonitor an saindang opisina tanganing tolos na makapagtao nin asistensiya sa mga mangangaipuhan kaini.
Sa ngunyan, pagirumdom na sana kan opisyal sa publiko na enkaso dae na maagihan an mga spillway dae na soboot magpirit pa tanganing malikayan an mga katibaadan.
