NAGA CITY – Pigkumpirmar kan Armed Forces of the Philippines (AFP) na pigtapaan kan mga barko kan China an pigkasang emergency medical evacuation kan mga personahes kan Philippine Coast Guard (PCG) sa sarong suldados na kaipohan i-ebakwar.
Sigun ki Philippine Navy spokesperson for the West Philippine Sea Rear Admiral Roy Vincent Trinidad, nangyari an insidente kan Hulyo 7, 2024 kun saen saro sa mga suldadong nakabase sa BRP Sierra Madre sa Ayungin Shoal an kinaipohang i-ebakwar asin darhon sa ospital. Alagad maski, nagsayuma ining idetalye an insidente, sinaysay man kini na nagin matrayumpo an mergency medical evacuation sa nasambitan ng suldado.
Sa ngunyan, nasa Camp Ricarte Station Hospital sa Puerto Princesa, Palawan an may helang na suldados.
Mientrastanto, nilinaw ni Trinidad na mayong rotation and resupply mission an isinagibo katakod sa nasambitan ng medical evacuation.
Tinawan-duon pa kaini na magtitinir an presensya kan Sandatahang Lakas sa mga islang pig-ookupar kan nasyon sa West Philippine Sea (WPS).
