NAGA CITY-Ginibo na sanang kangingiritan ngonyan kan mga netizens urog na kan mga Bicolano an pahayag ni Assistant Presidential Communication Operations Officer Mocha Uson na sa ciudad nin Naga madudukayan an Mayon volcano.
Nagkakalat ngonyan sa Facebook an manlaen laeng memes o edited pictures kan Mt. Mayon na garu nag world tour pa.
Sa nasambitang mga litrato, mahihiling an Mt. Mayon sa background kan mga bistadong tourist spots sa manlaen laeng parte kan kinaban arog kan Eiffel Tower sa Paris, Great Wall of China asin Merlion sa Singapore.
Igwa man mga taga-Naga na nagpost nin mga ladawan kan manlaen laeng simbahan sa ciudad asin sa likudan kaini mahihiling an Mayon volcano.
Maging an Bicolanong aktor asin tubong Naga City na si Enchong Dee, nakisabay man sa trending topic asin nagpost pa sa saiyang social media account nin litrato na igwa nin caption na sinasabing mapuli muna siya sa Naga City makalihis niya suboot na mabaretaan na igwa nin bagong bulkan sa ciudad.
Igwa man nin mga netizens na nagpost nin #MayonVolcano Naga Branch mantang igwa man nin pasubang nakiolay ki Asec. Uson na ibwelta naman sa probinsya nin Albay an bulkang Mayon arog kan ginibo niyang pagbwelta kan saiyang naresibeng pagbisto hale sa University of Sto. Tomas.
Agaw atensyon man an post kan sarong Facebook user na “prayers can move mountains, Asec. Uson can move volcanoes.”
Marurumduman na nakaguno nin batikos an video ni Uson sa saiyang twitter account kun saen nasambitan kaini na an Mayon volcano na presenteng nag-aalburoto nasa ciudad nin Naga imbes na sa probinsya nin Albay na tulos man kaining binawi asin pigtuga na nagkasala sana siya.
