Pigtawan-duon an importansya kan Licensed Psychometrician an mental health assessment asin an pag-implementar kan mga programa sa mental health sa mga kumpanya tanganing maprotehiran an mental health kan mga empleyado, lalo na an mga nakakaeksperyensya nin stress, anxiety asin burnout sa trabaho.
Sa intrevista kan Bombo Radyo Naga ki Efren Dominic Abiog – Licensed Psychometrician, sinabi kaini na an mga komun na kawsa nin stress sa lugar nin trabaho iyo an mga paorootrong gibohon, magabat na trabaho asin an takot kan mga empleyado na sabihon sa saindang mga superyor an saindang inaagihan. An mga senyales nin burnout kabali an grabeng emosyonal na kapagalan, pagkawara nin interes sa trabaho asin pagbaba kan kumpiyansa sa sadiri.
Bilang sarong lakdang, inenkaminar ni Abiog an mga empleyado na dai pag-intindihon an saindang mga namamatian, makanuod na magbugtak nin mga limitasyon sa trabaho, gamiton an saindang mga leave credits asin maghagad nin tabang sa Human Resources (HR) o mga pinagtitiwalaan na superyor.
Pigtawan-duon man niya an importansya kan work-life balance asin paggalang sa oras nin pahingalo kan lambang obrero.
Nagsuhestyon man si Abiog na magkondusir nin psychological assessment an mga kumpanya para madeterminaran an mga pangangaipo kan saindang mga empleyado asin maggibo nin mga programa na nakasentro sa stress management asin mental health awareness. Importante suboot an bukas na komunikasyon, tamang distribusyon kan mga trabaho asin pagkakaigwa nin ligtas na paagi para sa mga trabahador na magtao nin feedback.
Tinawan man ni Abiog duon an kahalagahan kan mga polisiya sa salud nin isip susog sa Republic Act No. 11036 o Mental Health Act.
Inenkaminar niya an mga among na konsideraron an karahayan kan saindang mga empleyado mantang inootob an mga katuyuhan kan kumpanya, mantang pinapagirumdom an mga obrero na an pag-ataman sa sadiri bakong makasadiri, kundi sarong importanteng parte kan pagmantenir kan marhay na salud
