NASA front row sinda Meryl Streep asin Stanley Tucci sa Milan Fashion Week show kan Dolce & Gabbana kan nakalihis na Sabado.
In character komo editor kan magazine na si Miranda Priestly asin an saiyang art director mantang kinukuanan an mga eksena para sa “The Devil Wears Prada 2”.
Parte kan ginigibong pelikula sa sequel kan sikat na fashion movie na ikukundusir sa Milan.
Si Anna Wintour, bistadong personalidad sa Vogue asin pigtuturing na inspirasyon sa karakter ni Miranda Priestly an yaon man sa show tangani mahiling an mga models na mag rampa sulot an pyjama-style trousers asin shirts, na pig ternuhan nin black lace lingerie o oversized jackets.
Kairiba sa mga accessories an mga faux fur na bag asin tsinelas, pati na man an itom na stiletto heels na pigsusulot kairiba an mid-calf socks.
An bagong koleksyon gikan sa mga designer na sinda Domenico Dolce asin Stefano Gabbana, na may titulong PJ Obsession.
An Milan Fashion Week, an ikatulong parte kan bulanang fashion show na nagpapahiling nin mga koleksyon kan Spring Summer, an madurar hasta sa Lunes antes na magpasiring an mga fashionista sa Paris.
