NAGA CITY- Masairarom na sa pre-shipment inspection an mga agriculture products sa mismong port of origin kan mga ini.
An implementasyon sa bagong polisiya an posibleng sa laog na kan tulong bulan mantang pighahalat pa an pag-aprobar kan Department of Finance.
Pagsisierto ni Department of Agriculture (DA) Secretary Francisco Tiu Laurel Jr. na an isasagibong pre-shipment inspection an masirbing susi tanganing mauntok an mga smuggling activities na nakakaraot sa kabuhayan kan mga paraoma asin nagsisirbing huma sa pansalud kan publiko.
Papakusogon man kaini an border control kan nasyon sa tahaw na man kan mga nagsusulputang health asin economic challenges dara kan paglalaog kan kadakol na imported products.
An bagong polisiya kan DA an kasunod na man kan piglalaoman na implementasyon kan cold examination facility for agriculture (CEFA) na nakatalaan sa masunod na taon. An CEFA an sarong state-of-the-art examination facility para sa gabos nin mga imported products siring kan mga hayop, sira, mga pananom, asin iba pang mga agricultural commodities.
Basado sa plano kan DA, an premirong pasilidad (CEFA) an ipapatindog sa Angat, Bulacan.
