NAGA CITY- Welcome sa mga alkalde sa Rehiyong Bikol an kasuguan ni Presidente Ferdinand R. Marcos Jr. na i-require an local government unit clearance para sa infrastructure project antes ining ikonsederar na kumpleto.
Sigun sa nagkapirang mga Mayor an deriktiba na ini an mabusol nin transparency asin masierto sa tamang fund utilization. Makakatabang soboot kaya an lakdang tanganing magamit an pondo nin tama asin matutustusan an pangangaipuhan kan mga namamanwaan.
Apwera pa digde, magkakaigwa man nin kapangyarihan an mga city engineering department asin publiko tanganing ma-verify kun an proyekto an naabot an dapat na standards antes na ideklarar na tapos na.
Susog sa kasuguan kan Presidente, an mga proyekto na bibilugon an dapat pigkonsulta sa mga alkalde antes, sa kasagsagan asin makalihis na matapos an proyekto.
Enot nang pigsaysay kan Presidente na an pag-require kan local chief executives sa pormal na pag-akseptar kan proyekto antes na ideklarar komo tapos na ini an importante tanganing malabanan an mga substandard outputs.
An mga local officials an yaon sa marhay na posisyon tanganing ma-verify enkaso an mga infrastructure an pigpatindog na nababase sa standard.
Sa ngunyan, nagpasalamat na sana an mga alkalde sa Rehiyong Bikol para sa tiwala na itinao kan Presidente sa saindang hanay.
