Dakula an paglaom kan mga apektadong residentes kan Brgy. Salvacion asin San Ramon Siruma Camsur na gaganahon an pakikipaglaban sa Wanderlust, an kumpanyang nakapagpatitulo kan saindang mga daga kabali na an sinasabing Timberland.
Sa intrevista kan Bombo Radyo Naga ki Randall Dagooc, saro sa mga apektadong residente kan Brgy. San Ramon, nasa 80-20 an tsansa na ganahon kan mga residente an kaso.
Sigon digdi, sunod nang isusunad sa korte an pagfile nin kaso kontra sa Wanderlust asin kinumpirmar ni Dogooc na masunad man nin kaso an Department of Agrarian Reform (DAR) in-behalf sa mga apektadong residentes orog na an mga Agrarian Reform Beneficiaries (ARB) asin boot man magsunad nin kaso kan DENR nin reversion case sa mga lugar na sakop kan Timberland.
Dagdag pa ni Dagooc, taong 1950 pa an iba sa mga titulong kapot ka mga benepisyaryo kan DAR alagad bigla na sanang nagbutwa an Wanderlust asin sinasabing igwa man ini nin kapot na titulo.
Naglalaom an mga residente na papanigan ini kan batas asin kakanselaron an titulo kan Wanderlust.
