NAGA CITY – Puspusan na an preparasyon na pigsasagibo kan mga atleta gikan sa manlaen-laeng eskwelahan kaibanan an saindang mga coaches, trainers, asin man chaperones sa syudad nin Naga para sa nagdadangadang na Bicol Meet.
Sa entrevista kan Bombo Radyo Naga ki Fernando Macaraig, Assistant Schools Division Superintendent kan Department of Education Naga, an Bicol Meet an madurar hasta sa Mayo 4 ngunyang taon.
Presenteng sibot an Division sports officer sa pag-monitor, asin piglilibot kaini sa mga training venues sa division tanganing ma-sierto na an mga kaakian an nagpepreparar para sa Bicol Meet.
Sigun pa sa opisyal, an torneyo an dakulang okasyon, nin huli ta ini an nagseserbing oportunidad para sa mga atleta orog na kun sinda an manggana yaon an posibilidad na makapartisipar an mga ini sa higher meet siring kan Palarong Pambansa na ikokondusir sa Cebu.
Nagseserbi man ining motibasyon sa mga kaakian kun tano labi an saindang paglapigot na mag-training asin paglaom na makasungkit nin medalya komo preparasyon sa maabot na Bicol Meet.
Kadakul man an nakatagamang venue nin huli ta kanya-kanyang practice na an mga atleta, siring kan para sa basketball, archery, swimming, kun saen kada sport an igwa nin sadiring venue.
Piglalaoman man kaini na magigin paborable sa division kan Naga an partisipasyon ninda sa Bicol Meet.
Manunungod man sa pinansyal na suporta para sa mga atleta kan Naga na mapasiring sa siyudad nin Legazpi, an city government kan Naga nagtao na nin poco mas o menos ₱9 Million gikan sa Special Education Fund o SEF tanganing masimbagan an pinansyal na pangangaipo kan saindang mga atleta.
Sa kantidad man na ini kukuanon an para sa pagkakan kan mga atleta, pambakal nin uniform, training asin iba pang materyales, asin man transportasyon.
Magamit man sinda nin pondo gikan sa Department of Education tanganing ma-asigurar na gabos na pinansyal na pangangaipo kan mga partisipantes sa Bicol Meet an masisimbagan.
