Nagpaabot nin pagbati an pirang bistadong personalidad sa Pilipinas kay Alex Eala makalihis kaining makua an makasaysayang pagkagana sa 2026 Mubadala DC Open.
Sa Instagram, pinahiling ni Eala an litrato mantang kapot an enot niyang WTA singles trophy katakod an caption na, “Me and my first.”
Kabali sa mga nagtaong nin mensahe an broadcaster na si Karen Davila na nagsabing, “Congratulations! Tears of joy! Hard-earned victory! Bravo, Alex!”
Nagpahayag man nin paghanga sina television host Bianca Gonzalez at Iya Villania, na parihas nagsabing ipinagmamalaki ninda an pagkagana kan Filipina tennis star.
Mientrastanto, sinabi man kan aktres na si Iza Calzado na nagtutubod siyang puon pa lang ini kan mas dakol pagka gana ni Eala.
Nagibo nin kasaysayan ni Eala makalihis daugon an world No. 3 na si Jessica Pegula kan Estados Unidos, 4-6, 6-4, 6-0, nganing masungkit an saiyang enot na WTA singles title.
Sa saiyang pagkagana, naging pinaka enot na Pilipinong parakawat nin tennis si Eala na nagkampeon sa sarong WTA Tour event.
Sa saiyang post-match intrevista, sinabi kan 21-anyos na atleta na subra niyang namati an pagpadaba asin suporta hali sa saiyang pamilya, mga barkada, asin mga taga suporta bago pa man an finals.
Nagpasalamat man si Eala sa Filipino community sa Washington, D.C., asin sa gabos n Pilipinong sumuporta sa saiya sain mang panig kan mundo.
