Nangapudan an transport group na Condor Piston Bicol sa gobyerno na mag-implementar nin mas halawig na lakdang tanganing masimbagan an padagos na paglangkaw kan presyo kan petrolyo, imbes na magsarig na sana sa presenteng fuel discount asin subsidy.
Sa intrevista kan Bombo Radyo Naga kay Ramon Rescovilla, Spokesperson, Condor-Piston Bicol, tinawang-duon kaini na poon kan Hulyo, naglangkaw na nin labi sa ₱26 an presyo kan diesel kun kaya nalugi an kada driver nin haros ₱1,000 kada aldaw sa saindang kita. Sinabi pa ni Rescovilla na an mga drayber dai gayo nakakamati kan dagdag na ₱2 na subsidiya sa gasolina huli ta ini tulos na minaduman sa ibang gastos arog kan krudo asin operasyon sa transportasyon.
Segun ki Ramon Rescovilla, kulang an nasabing ayuda huli nagseserbi sana ining temporaryong takop sa mas hararom na problema sa sektor kan transportasyon.
Mientrastanto, nagpahayag nin pagkadisganar an grupo sa suboot maluway na pagdistribwir kan ipinanugang ₱5,000 na fuel subsidy para sa mga drayber sa rehiyong Bicol, partikularmente sa Albay. Sigon ki Rescovilla, igwa nin mga problemang kinakahampang an sistema kan LTFRB asin DSWD kun saen garo mas tinatawan nin prayoridad an mga darakulang kooperatiba, mantang igwa man nin mga kwalipikadong drayber na dae pa man giraray nakakaresibe nin ayuda.
Tinawan man nin duon ka ni Rescovilla kan Condor Piston Bicol an saindang pangapodan para sa pagrepaso asin lubos na paghale kan Oil Deregulation Law, na suboot nagtutugot sa mga darakulang oil companies na magbugtak nin presyo na mayong supisyenteng kontrol gikan sa gobyerno. Ipigproponer man kan grupo an temporaryong pagsuspinde kan 12% VAT asin excise tax sa mga produktong petrolyo tanganing mabawasan daa an presyo kan lana nin pigkakarkulong ₱15 hasta ₱19 kada litro.
Manungod sa implementasyon kan 30 hasta 40 kilometros por ora speed limit sa Ciudad nin Naga, sinabi ni Rescovilla na suportado ninda an lakdang para sa kaligtasan kan mga motorista asin pedestrians.
Alagad, nanindugan ini na an nagkapira sa mga insidente nin pagpapadalagan nin marikas asin pagkarera sa tinampo an kawsa kan desesperadong pangangaipo kan mga drayber na magkaigwa nin kwarta tanganing maabot an boundary asin masimbagan an halangkaw na gastos sa operasyon.
Para sa grupo, kaipuhan an mas hararom na reporma tanganing maseguro an tunay na kaginhawahan para sa mga drayber asin sa publiko.
