Pigpapaasegurar nin Kamanggagawa Party-list Rep. Elijah “Eli” San Fernando na dae madedehada an mga trabahador kun madagos an implementasyon kan 4-day work week.
An pangapodan ni San Fernando may koneksyon sa padagos na pag-aadal kan administrasyon sa implementasyon kan 4-day work week bilang paagi tanganing makatipid sa hampang kan paglangkaw kan presyo kan petrolyo huli kan kariribokan sa Middle East.
Naiintindihan ni San Fernando an krisis sa langis asin an pangangaipo na makatipid nin enerhiya alagad nanindugan na dai dapat magin rason an 4-day work week para mabawasan an sweldo kan mga trabahador.
Segun ki San Fernando, an apat na working days kan mga empleyado dapat igwa man giraray nin full pay sa walong oras na trabaho asin overtime pay sa extra hours.
Kasabay kaini, pig-eenkaminar man ni San Fernando an gobyerno asin pribadong sektor na gamiton an mga existing law para makatipid sa enerhiya arog kan Telecommuting Act kun saen maiimplementar an work-from-home asin iba pang flexible work arrangements.
