NAGA CITY – Tinawan duon kan sarong legal council na enkaso an Regional Tripartite Wages and Productivity Board na an nagpautob nin dugang sa sweldo kan mga obrero otomatiko itong dapat na sunudon kan mga employer.
Sa entrevista kan Bombo Radyo Naga ki Atty. Anna Mari Apples Abarcar, legal council kan Abarcar Law office and Transfer services, sinaysay kaini na enkaso naman an sarong kompanya an nagpautob nin paglangkaw sa sweldo kan saindang mga obrero dae man obligasyon kan iba pang kompanya na sunudan ini. Alagad enkaso an gobierno na mismo an nagsugo otomatiko asin mandatoryo ining dapat na ipautob kan mga kompanya.
Enkaso naman dae nagsunod an sarong kompanya sa increase na pigtalaan kan Regional Tripartite Board mas makakamarhay na irani na ini sa Department of Labor and Employment tanganing mapaliwanagan sinda dapit digdi.
Tinawan duon man ni Abarcar na dae man rason na dae updated an sarong employer dapit sa mga siring na pagbabago asin dae man salbado digdi an mga nagpupuon pa sanang mga negosyo.
Pig-eksplikar man kan opisyal kun tanu mas halangkaw an pigtatalaang wage increase sa Metro Manila asin sa mga probinsya. Ini an huli sa mas halangkaw na demand asin presyo kan mga pangangaipuhan kan sarong pamilya.
