Pinangaranan na kan International Criminal Court (ICC) sinda Senador Ronald “Bato” dela Rosa asin Senador Christopher Lawrence “Bong” Go komo mga co-perpetrators sa kasong igwang kinaaraman sa kampanya kontra droga ni dating President Rodrigo Duterte.
Basado sa pigpaluwas na Document Containing the Charges (DCC) kan Pebrero 13, 2026, pigtukoy si Duterte komo indirect co-perpetrator sa irarom kan Article 25 (3)(a) kan Rome Statute para sa mga krimen kontra sa sangkatauhan, partikular na murder asin attempted murder.
Nakapalaman sa dokumento na an mga paggadan an nangyari puon 2011 hasta 2019, kabali an mga insidente sa Davao City na pigkokonektar sa Davao Death Squad, asin mga operasyon sa irarom kan“war on drugs” sa panahon kan saiyang administrasyon.
Sigun sa ICC, an pagkakabali ninda dela Rosa asin Go sa listahan an huli sa saindang papel sa pagpapautob asin pagsuporta sa mga polisiya kan drug war.
Kaibahan man sa mga pigtukoy na opisyal an pirang dating miyembro kan gabinete asin law enforcement agencies na igwang direktang kinaaraman sa operasyon.
An mga minasunod an pigtukoy na pangaran kan ICC: Ronald “Bato” Dela Rosa, Vicente Danao, Camilo Cascolan, Oscar Albayalde, Christopher Lawrence “Bong” Go, Dante Gierran, Isidto Lapeña, Vitaliano Aguirre II asin Iba pang opisyal kan Philippine National Police asin high-ranking government officials.
Sa presente, nakatalaan na pag-adalan kan Pre-Trial Chamber an mga ebidensiya tanganing matukoy kun mausad an paglilitis.
Pigtatawan duon kan ICC na an pagluluwas kan dokumento an parte kan transparency asin tanganing maipahiling an sakop kan paninimbagan sa pigmirar na “war on drugs” kan Pilipinas.
