Makakakua nin year-end bonus na katumbas nin sarong bulan na basic salary, kaiba an P5,000 cash gift, an mga kwalipikadong kawani kan gobyerno sa saindang enot sweldo para sa bulan nin Nobyembre.
Kinumpirma ini kan Department of Budget and Management o DBM, na nagpaluwas na nin P82.998 billion na pondo para sa year-end benefits kan mga kwalipikadong sibilyan, Military Personnel asin Uniformed Personnel.
Segun sa DBM, nakalaan an P73.449 billion para sa year-end bonuses, mantang P9.549 billion naman para sa cash gifts.
Sa pahayag ni Budget Secretary Kim Robert de Leon, responsibilidad kan kada ahensya na masigurong matatanggap kan mga empleyado an saindang benepisyo sa itinakdang panahon, kaiba kan unang sweldo sa Nobyembre.
Mahigpit man na pinagirumdum kan DBM sa mga ahensya na dai ipapauktaba an pagbayad o maghimo nin hiwalay na payroll para sa year-end bonus asin cash gift.
Para magin kwalipikado sa buong benepisyo, kinakailangang nakapagserbisyo an empleyado nin labing menos apat na bulan o 120 days sa panahon kan Enero 1 hasta Oktubre 31, 2026, asin nasa serbisyo pa kan gobyerno sa huring petsa.
Sakop kan benepisyo an mga regular, contractual asin casual employees sa national asin local government, kabilang an mga nag-avail nin awtorisadong leave of absence na may bayad.
Nilinaw man kan DBM na kompleto nang naipaluwas an pondo para sa mga benepisyong ini sa mga ahensya sa pagsisimula kan fiscal year 2026.
Alagad, an aktuwal na petsa kan pagbayad nakadepende sa payroll schedule kan kada ahensya, sabay na maibigay an year-end bonus asin P5,000 cash gift kaiba kan unang sweldo sa Nobyembre.
