Nag-abot na sa Mactan Expo sa cuidad kan Lapu-Lapu, Cebu an manlaen-laen na defense secretaries asin ministers hali sa Association of Southeast Asian Nations (ASEAN) para sa pagbukas kan ika-20 ASEAN Defense Ministers’ Meeting (ADMM) 2026.
Segun sa report kan Bombo Radyo Cebu, personal na sinabat ni Department of National Defense (DND) Secretary Gilberto “Gibo” Teodoro Jr. si ASEAN Secretary-General H.E. Dr. Kao Kim Hourn kaiba an mga delegado hali sa mga kaapil na nasyon.
Sentro sa mga pangenot na aktibidad an mga diskusyon sa pag-ultanan kan 11 nasyon na kaapil kan samahan, siring man an ADMM-Plus meetings kaiba an mga partner nations arog kan Japan, United States, Australia, India, New Zealand, asin Russia.
Kinumpirma man kan China na an saindang Defense Attaché sana an matukaw sa ADMM-Plus bukas, Oktubre 29, na ibinibilang kan iba bilang pinakahababang lebel kan saindang partisipasyon poon kan 2010.
Mientrastanto, piglalaoman an pag-abot ngunyan na hapon sa Cebu ni US Defense Secretary Pete Hegseth tanganing pormal na magpartisipar sa mga nakatalaan na pagtiripon.
Pangenot na pag-oolayan sa duwang aldaw na pagtiripon an pagpakusog kan seguridad asin kooperasyon sa depensa sa Timog-Silangang Asya, partikular an pagsimbag sa mga huma sa rehiyon asin an padagos na isyu sa West Philippine Sea.
