NAGA CITY- Prangkang sinaysay ni Ako Bicol (AKB) Partylist Representative Rodel Batocabe na nasa kamot na kan mga namamanwaan an paghusga ki Chief Justice Maria Lourdes Sereno.
Sa entrevista kan Bombo Radyo Naga ki Batocabe, sinaysay kaini na dakula an magigin papel kan publiko tangani na matimbang kun dapat na magtinir si Sereno sa saiyang pwesto o dagos nang sikadan.
Segun ki Batocabe, dakula an pagkakaiba kan impeachment proceedings sa simpleng pagdangog sana sa mga korte kun sain an mga nangyayari dae sana pigbabase sa nakasurat sa libro, en vez, pigtatawan nin tsansa na kuanon an opinyon kan mga namamanwaan.
Sa ngonian, ma-depende suboot an paghiro kan nasambitang isyu sa iluluwas na ebidensya kontra sa chief justice asin an magigin depensa kaini.
Kun marurumduman, saro si Batocabe sa nagboto pabor sa impeachment kontra sa pamayong mahistrado.
