NAGA CITY – Nagpatanid an sarong abogado sa mga agom na nakadakop sa saindang mga agom na igwa nin kalaguyo na dae pag-iagi sa social media asin pamamasupog publicly an pagpapanimbag sa mga ini.
Sa entrevista kan Bombo Radyo Naga ki Atty. Clarence Joseph Ronquillo, trial lawyer, kagsadiri kan sarong law office, sinaysay kaini na mas makakamarhay na direkta nang magsunad nin kaso sa korte an sarong babae o lalaki orog na kun igwa na ini nin solidong ebidensya kan pangangaliwa kan saiyang agom.
Kun igwa naman nin solidong ebidensya asin an penalidad sa posibleng kaso an labi na sarong taon dae naman ini kaipuhan pa na iagi sa barangay kun kaya mas magigin marekas an pagsusunad nin kaso kontra sa mga ini.
An penalidad para sa concubinage and adultery an labi man sarong taon kun kaya pupwede ining direktar nang magsunad nin kaso.
Dugang pa ni Ronquillo, dawa na masakit dapat na kontrolon kan sarong babae o lalaki an saindang kaanggutan sa saindang mga agom asin sa kabit kaini asin iagi sa tamang proseso an paglaban kontra sa mga ini tanganing malikayan na mabaliktad an kaso.
