Pinahigot pa kan kapulisan sa Bulacan an pagsawata sa mga naggigibong mga iligal na paputok mantang nagdadangadang na an pagselebrar kan Pasko asin Bagong taon.
Partikularmente na digde an mga paputok na mapeligro na nagsasabog na igwang mga agaw-pansin na pangaran siring na sana kan mga mga kinua sa mga nagpasabog kan rebelasyon sa korapsiyon sa flood control projects siring ninda Curlee asin Sarah Discaya, Zaldy Co, siring man an pangaran ni Senator Imee, na nagbuyagyag na naggagamit soboot nin iligal na droga an saiyang tugang na si Presidente Ferdinand Marcos Jr asin makukusog na bagyong nagtama sa nasyon na Tino asin Uwan.
Alagad, sigun ki Bulacan Police Director Col. Angel Garcillano, anuman an iapod sa mga paputok, nagtitinir pa mang iligal an mga ini.
Patanid kaini na pwedeng arestaron, kasuhan an mga manufacturer kan iligal na paputok asin kukumpiskaron asin rarauton an saindang mga produkto.
Ipinagsugo man kan Bulacan Police Director sa gabos kan mga hepe sa probinsiya na kumpikaron an mga iligal na paputok antes pa man an holiday season.
