Preparado an gobyerno kan Pilipinas na tabangan an mga Filipino na naapektaran kan mahewasang wildfires sa katimugang parte kan California.
Sinaysay ni Department of Foreign Affairs (DFA) Assistant Secretary Adelio Angelito Cruz, na padagos sindang nakikipag-koordinar sa mga kababayan sa gabos nin klase kan paagi.
Sigun pa ki Cruz, kadaklan sa mga Filipino an nasa irarom kan mandatory evacuation. Naenot na man naghagad nin tabang an mga Pinoy asin Filipino-Americans huli ta pira sa sainda an nasulo an mga kagsadiri.
Mientrastanto, nagluwas na man nin abiso an Philippine Consulate General sa Los Angeles sa mga Filipino nationals na makipag-koordinar sa diplomatic post para sa kaipohang tabang.
Sinaysay man ni Cruz na sa ngunyan an tolong Pilipinong pamilya pa sana an nakikipag-koordinar sa sainda tanganing maghagad nin tabang. Pig-abisuhan man kan Consulate an Filipino community sa mga lugar na naapektaran kan wildfires sa Los Angeles County na magsunod sa mga lokal na advisory, mag-ingat asin magsunod sa evacuation centers.
