NAGA CITY- Nagpapadagos an mga programa kan PDEA-Bicol partikularmente kontra sa iligal na droga para sa bilog na Bicol Region.
Sa entrevista kan Bombo Radyo Naga ki Agent Gio, PDEA-CSPO PIO, sinaysay kaini na numero uno sa saindang pigpopukusan na programa sa presente an pig-aapod na barangay drug clearing program kun saen katabang kan saindang opisina an PNP, LGU’s asin iba pang ahensiya.
Sigun sa opisyal, obheto soboot kan nasambitan ng lakdang an dagusang mapuho an iligal na droga sa mga barangay sa bilog na Rehiyong Bikol.
Katakod digde, pig-orgulyo man ni Agent Gio na sa bilog na Bicol Region igwa ng nasa 103 an piglunsar na Balay Silangan kun saen sa probinsiya kan Camarines Sur kabali na an siyudad nin Naga igwa na nin nasa 35.
Marurumduman, an Balay Silangan an sarong facility na pigbilog para sa mga surrendered drug personalities na bakong users o dependents sa drog na kun saen sinda an pigtatawan nin intervention, counseling, asin livelihood tanganing matabangan an mga ini na magin mas productive asin law-abiding citizens makalihis na sinda an ma- reintroduced o ma-reintegrate sa komunidad.
Dugang pa kan opisyal, mapakol sa anom na bulan an kaipuhan na itinir kan mga nasambitan ng indibidwal sa Balay Silangan tanganing makumpleto an programa.
Mientrastanto, mayo pa man soboot nairehistro na indibidwal na naglaog sa Balay Silangan na liwat na nagbalik sa dati kaining ginigibo.
Sa ngunyan, liwat na sanang pinagirumduman kaini an publiko na likayan an anuman na iligal na aktibidad tanganing dae man mabugtak sa alanganin na sitwasyon.
