NAGA CITY- Mapadagos an manlaen-laen na programa kan gobierno para sa mga dating rebelde asin bulnerableng komunidad sa Bicol Region sa irarom kan Payapa at Masaganang Pamayanan (Pamana) program sa 2026.
Pigsaysay ni Presidential Peace Adviser Carlito Galvez Jr. sa kasuarin sana na pagbisita kaini sa 9th Infantry Division headquarters sa Pili, Camarines Sur an pag-apruba kan bagong Pamana proposals na nakatalaan na i-implementar sa 2026.
An proyekto na ini kinababalihan kan paharong para sa mga dating rebelde sa Bulan, Sorsogon, konstruksyon kan commercial building sa People’s Organization sa Naga City, na labing naapektaran kan Severe Tropical Storm “Kristine” na nagkawsa man nin pagbabaha sa Rehiyon kan October 2024.
Sigun ki Galvez, nag-alokar sinda nin nasa P258 million para sa nasambitan ng proyekto sa taong 2026
Pigheras man kan opisyal na an pigbubusol na katuninongan sa Rehiyon an nagbubunga man nin marhay na resulta orog na sa pagsimbag sa ugat kan sagupaan sa pag-ultanan kan mga rebeldeng grupo asin tropa kan gobierno.
Marurumduman sa Bicol Region, an Pamana projects an pig-implementar sa mga pig-aapod na geographically isolated asin disadvantaged areas, partikularmente sa komunidad na igwang nairerehistrong sagupaan.
An mga proyekto kinababalihan kan konstruksyon kan mga tinampo, kabuhayan, water systems, pagpapatindong nin mga eskwelahan asin pagpapamarhay kan salud.
Sa ngunyan, pigpapasierto na sana kan opisyal an mahigot na monitoring kan proyekto para sa mas epektibong implementasyon.
