Pigreport kan sarong halangkaw na opisyal kan Israel na halangkaw pa man giraray an porsyento kan mga Palestinian na dae pa nag-iibakwar kun saen 10% pa sana sa 1 milyong residente kan Gaza City an nag-iibakwar o poco mas o menos 70,000 katawo.
Basado sa report, igwa na soboot plano kan Israel na iuntok an mga humanitarian airdrops sa Gaza City asin bawasan an paglaog kan mga truck nin mga pagkakan sa parte kan Gaza Strip.
Obheto kaini na piriton an mga tawo na nag-ibakwar na. Kan nakalihis na bulan, pigpahayag kan Coordination of Government Activities in the Territories (COGAT), an departamentong nagmamanehar sa ayuda, na magtatao ini nin mga tolda para sa mga Palestinian antes ibalyo an mga ini sa timog na parte kan Gaza.
Alagad hasta kan nakalihis na Martes, 3,000 tolda pa sana an nailaog, harayo sa target na 100,000 sa laog nin tolong semana.
Mietrastanto, pahehewason pa kan U.S. asin Israel an mga distribution site kan kontrobersyal na Gaza Humanitarian Foundation (GHF), gikan sa apat sa 16.
Dugang pa digde, mayo ni saro sa mga bagong site an makukua sa Gaza City kun saen mayo pang kasiertuhan kun operational an mga ini.
Enot na digde, kadakol pa soboot na mga residente kan Gaza City an nagsayuma na mag-ibwakr kun saen mas pipilion na magadan sa sadiri nindang harong kaysa mapahali sa saindang sadiring daga.
