Ipinaliwanag kan dating Chief Investor Relations kan Bangko Sentral ng Pilipinas (BSP) an mga pangenot na salik sa pagluya kan piso kontra dolyar, na nag-abot sa ₱63.61 kada US dollar.
Sa intrevista kan Bombo Radyo Naga ki Corazon Guidote | Economist and Former Investor Relation Head, BSP, sinabi kaini an pagluya kan piso ay resulta kan mas dakulang demand para sa dolyar kumpara sa suplay kaini sa foreign exchange market.
Kabilang sa mga salik na nagtutulod sa paghina kan piso an pagtaas kan presyo kan krudo sa internasyonal na merkado, pagluya kan foreign investments, posibleng pagluya kan remittances kan mga Overseas Filipino Workers (OFWs), asin pagdakul kan pangungutang kan gobyerno. An mga ini nagdadagdag sa pangangaipo nin dolyar, partikular sa pag-angkat nin langis asin iba pang produkto hale sa ibang nasyon.
Posibleng magkawsa man an pagluya kan piso nin mas halangkaw na presyo kan mga pangenot na pangangaipo, siring kan bagas, gasolina, medisina asin iba pang imported na produkto. An pagmahal kan langis an nakakaapekto man sa gastos sa transportasyon asin logistics, na posibleng magtulod sa dugang na pagtaas kan presyo kan mga paninda asin makabawas sa purchasing power kan mga pamilya.
Segun ki Guidote, limitado an magigibo kan BSP sa pagpigil sa paghina kan piso paagi sa paggamit kan foreign exchange reserves, dahil posibleng maubos an mga reserba kun padagos na gagamiton ini sa pagsuporta sa lokal na salapi. Pigtawan-duon man niya an kahalagahan kan fiscal discipline, pagpaunlad kan sektor kan agrikultura, asin pag-enkaminar nin mas dakulang foreign investments tanganing mabawasan an pagdepende kan nasyon sa mga imported na produkto.
Pig-enkaminar ni Guidotti an publiko asin mga negosyante na bantayan an inflation rate, presyo kan krudo sa internasyonal na merkado, utang kan gobyerno, asin remittances kan mga OFW. Pinayuhan man niya an mga pamilya na magtipid, magplano nin mas maingat sa mga gastohon, asin maghanda sa posibleng padagos na pagmahal kan mga pangunahing pangangaipo.
