Mainit an naging debate kan mga Senador sa prosopwesto ni Senator Robinhood Padilla na ibaba sa 10-anyos an minimum age kan criminal responsibility para sa mga kaakian na nakagibo nin karumal-dumal na krimen.
Pigbuyagyag ni Padilla an serye kan mga krimen na kinaimbweltuhan kan mga menor de edad siring kan paggadan asin panglulugos.
Alagad pigtutulan ini ni Senator Kiko Pangilinan na iyong proponent kan Juvenile Justice and Welfare Act o an Republic Act 9344.
Sigun ki Pangilinan, mayo sa pagpapababa kan edad an solusyon tanganing dae makagibo nin krimen an kajovenan kundi nasa mahigot na pagpapautob kan ley.
Pigpunto pa kan Senador na sa irarom kan batas, maski 10-anyos pa sana an aki asin nakagibo na nin magabat na krimen siring kan panglulugos igwa pa man giraray ining sarong taon na sapiritang pagkakakulong asin posible ining pahewason depende sa magigin desisyon kan korte asin nag-iiral na ley.
