Magdaraos ng all-member caucus ang mga senador upang talakayin ang paghahanda sa posibleng impeachment trial ni Vice President Sara Duterte kasunod ng pag-usad ng mga reklamo laban sa kanya sa Kamara.
Ayon kay Senate President Vicente Sotto III, tatalakayin sa caucus ang mga hakbang na dapat gawin sakaling maipasa ng House of Representatives ang Articles of Impeachment sa Senado.
Nangyari ito matapos pagtibayin ng House Committee on Justice, sa pamamagitan ng unanimous vote, ang pagkakaroon ng probable cause sa dalawang impeachment complaint laban sa Pangalawang Pangulo.
Iginiit ni Sotto na kikilos ang Senado “forthwith” o sa lalong madaling panahon kapag natanggap ang Articles of Impeachment, alinsunod sa 1987 Constitution of the Philippines.
Gayunman, nilinaw ng Supreme Court of the Philippines na ang terminong “forthwith” ay nangangahulugang sa loob ng makatwirang panahon at hindi kinakailangang agad-agad.
Kabilang sa mga paratang laban kay Duterte ang umano’y maling paggamit ng P612.5 milyong confidential funds, pagbabanta umano laban kay Pangulong Ferdinand Marcos Jr. at kanyang pamilya, at pagkakaroon ng hindi maipaliwanag na yaman.
Samantala, iginiit ng kampo ng Pangalawang Pangulo na hindi nakakagulat ang naging desisyon ng komite, at kinuwestiyon ang ebidensyang iniharap ng National Bureau of Investigation, na umano’y “curated” at kulang sa konteksto.
Ayon sa abogado ni Duterte na si Atty. Paul Lawrence Lim, mahina ang mga paratang at hindi sapat upang patunayan ang probable cause laban sa kanyang kliyente.
